စိတြဂီဝါ

ဘုရားအလောင်းစိတြဂီဝါ၊ ဟေမဝါသေလာ ငှက်အပေါင်း ထောင်သောင်း ခညောင်းကြပေတာ။

ဂနိုင်ဆီးတဲ့ မြိုင်တောကြီးထဲမှာ၊ (အလောင်းတော် ခိုမင်း သင်းဖွဲ့ကာ)၂၊ (ထင်ရှားစွာ)၂၊ လမ်းမမှားဘို့ နေ့စဉ် ဟောကြားကာ၊ (ငှက်ပေါင်းတောင်းဆုခြွေကကာ၊ သနားကရုဏာ၊ တရားရှုကာ၊ သနားကရုဏာ)၂၊ စိတြဂီဝါခိုမင်း ထင်လင်းပါ။

(ရှေးသရောအခါ ပြည်ဗာရာတွင်း ဆင်းသက်လာ၊ သင်းဖွဲ့ကာ၊ အစာရှာရန် မြန်းခဲ့တာ)၂၊ (သတ္တဝါငှက်ပေါင်း ထောင် သောင်းပါ)၂၊ အလောင်းတော်မှာ ပိုက်ကွန်တွင်းက ကင်းလွတ်စေရန် နေ့စဉ်ကြံဆကာ။

ရန်ဘယာ မသန်းကာ စိတ်အေးချမ်းစွာ၊ လောင်းမြတ်ဉာဏ်မျှော်တာ။ အော် ဆုံးမတော်မူရှာ၊ ပိုက်ကွန်တွင်းက လွတ် ​ကင်းရာ ရန်သူတွေဝေးကွာအောင်သာ၊ ညီညီညာညာလွတ်မြောက်ခဲ့ဘူးတာ၊ အလောင်းတော်မြတ်ခိုမင်းမှာ။

တရံရောအခါ ဟေမာအိုင်အကူး (မြူးကာ မြူးကာ)၂၊ သီးပွင့်စုံစွာ စားသောက်ဖွယ်ရာ၊ သုံးဆောင်ကာအပြီး ခရီးကလာ၊ (စိတြ)၂ ဂီဝါ၊ သီးနှံငုံကင်း ဆောင်ကြဉ်းခဲ့တာ၊ အော် မိဘများပါစုံစွာ၊ သားမယားကိုကျွေး အလှူပေးဘို့ ရာ၊ အော် လောင်းမြတ်ရာဇာ သာဓက ပုံတင်ကာသာ၊ ရှာမှီးဥစ္စာ ကိုယ်ရေးတွက်ပါ၊ သုံးဘို့တဖို့ပါ၊ ဝေဖန်၍ပင် ထား သင့်တာ။

ရန်ဘယာမသန်းကာ.....................ခိုမင်းမှာ။

ရေး-ရွှေတိုင်ညွန့်

ဆို-မကြည်အောင်

သပြေသီးကောက်

ဝါဆို ဝါခေါင် ရေတွေကြီးလို့

သပြေသီးမှည့် ကောက်စို့ကွယ်။


ခရာဆူးချုံ ဟိုအထဲက

မျော့နက်မည်းကြီး တွယ်တတ်တယ်။


မျော့နက်ဆိုတာ ချိုနဲ့လားကွဲ့

မြွေနဂါးတောင် ကြောက်ဘူးကွယ်။


တို့လည်း ကြောက်ပေါင် အတူသွားစို့

အုန်းလက်နွားလေး ထားခဲ့မယ်

သွားကွယ် သွားကွယ်။

မင်းသုဝဏ်(၁၉ဝ၉-၂ဝဝ၄)

July, August... rain and flood

Let's go pick the ripe rose-apple,


Hi! Take care! In thorns and mud

That's where big-black leeches grapple,


Leeches? Bah! The thornless things,

I'll fight snakes of serpent-kings,


Who's afraid? Let's all go now,

I'll just leave my coconut cow,

Come on! Come on!

[Translated by Prof: G.H.Luce]

လူ့အလွှာတခု

မိမိမောင်မောင်၊ ချစ်ခင်ယောင်ဖြင့်

အိတ်ထောင်ကိုကြည့်၊ ဘာများရှိမည်

သတိမလစ်၊ မလပ်ကြစေရ။


ပတ်ချွဲနပ်ချွဲ၊ ရွှေမှုန်ကြဲ၍

ကပ်ချွဲယပ်ချွဲ၊ ပေါ်ယံဟဲ၍

ကျိတ်ခဲဂုဏ်ပြိုင်၊ ဟိတ်ချင်းဆိုင်မည်

အနိုင်ကိုယ့်ထက် မကြောစေရ။


တည်ငြိမ်မလှုပ်၊ မင်းစိုးရုပ်ဖြင့်

မျက်မှောင်ကွေးကြုတ်၊ ပေါ်စီးရုပ်ဖြင့်

နှုတ်ခမ်းပြေ့ပြေ့၊ တင်းတင်းစေ့မည်

ကိုယ့်ရှေ့ရောက်သူ မရှိစေရ။


ငါသာလျှင်တတ်၊ ငါသာမြတ်၏

ဆတ်ဆတ်မခံ၊ ပညာ့မာန်ဖြင့်။


ငါသာလျှင်သိ၊ ငါသာပြည့်၏

အထိမခံ ပညာ့မာန်ဖြင့်။


ဘယ်အချိန်တွင်၊ ဘယ်ထမိန်နှင့်

ဘယ်ခရီးတွင်၊ ဘယ်ထီးဆောင်း၍

ဘယ်စခန်းတွင်၊ ဘယ်ပန်းပန်၍

ဆောင်းမှာတထွေ၊ နွေမှာတမျိုး

မိုး၌တခြား၊ အစားစားလျှင်

ကွဲပြားရောင်စုံ၊ အရေခြုံသည်

ရွှေဘုံထက်က ပုတ်သင်တည်း။

ဗန်းမော်ညိုနွဲ့

ရှုမဝရုပ်စုံမဂ္ဂဇင်း၊ ၁၉၆၈ ခုနှစ်၊ မေလ၊ အတွဲ ၂၁၊ အမှတ် ၂၅၂၊ နှာ ၂။

ညအလုပ်သမား

ရွှေလသာလည်း

မသာနိုင်ဘဲ ကိုယ့်ရင်ထဲ...။


ငွေကြယ်လက်လည်း

မစက်နိုင်ဘဲ ကိုယ့်ရင်ထဲ...။


ငွေကြယ်နှင့်လ

ထွန်းလင်းပလည်း၊ ဘဝ ဝမ်းစာ

ညဉ့်အခါတွင်၊ ဖွေရှာကြံဆ

ရုန်းကန်ရမို့

ည...ည ဆိုလျှင်၊ ပြုံးမရွှင်ပြီ

နီကျင်မိုးသောက်တိုင်အောင်တည်း။

ဖျာပုံ-နီလုံဦး

ရှုမဝရုပ်စုံမဂ္ဂဇင်း၊ ၁၉၆၈ ခုနှစ်၊ မေလ၊ အတွဲ ၂၁၊ အမှတ် ၂၅၂၊ နှာ ၃၁။

 

ပတ္တမြားရတု

ကြိုးကြာမောင်နှံ၊ တောင်ပံယှက်ကာ

သောင်ကမ်းသာ၌၊ သစ္စာချစ်တေး

ကျူးရင့်ကြွေးသည်

ရွှင်အေးသာစွ တဘဝ။


နှစ်လေးဆယ်မျှ၊ တကွတူနေ

သက်ဝေချစ်ကြင်၊ တို့ပင်လျှင်လည်း

မငြင်မငြို၊ ရှေ့ကို မျှော်ကြည့်

လျှောက်သည့်ခြေလှမ်း၊ ခယောင်းလမ်း၌

ပင်ပန်းပါလျက်၊ လက်တွဲဆက်ကာ

ဖိုလ်မဂ်ချမ်းသာ၊ ရှာဆဲပါတည့်။

နုယဉ်