သခင်ဘသောင်း

ကမ္ဘာ့ရာဇဝင်ချုပ် ဘာသာပြန်စာအုပ်ဖြင့် ဆုရသူ ဆရာကြီးသခင်ဘသောင်းကို ၁၉ဝ၁ ခုနှစ်၊ ဖေဖေါ်ဝါရီလ၊ ၇ ရက်နေ့ တွင် မကွေးခရိုင် နတ်မောက်မြို့နယ်၊ ဖုံကုန်းရွာ၌ ဖွားမြင်၍ အဖ ဦးမြစ်၊ အမိ ဒေါ်လေးခင် ဖြစ်၏။

ငယ်စဉ်က မန္တလေးမြို့၊ ဗုဒ္ဓသာသနာ့နုဂ္ဂဟ အင်္ဂလိပ်မြန်မာ အထက်တန်းကျောင်းတွင် ၁ဝ တန်းအထိ ပညာဆည်းပူးခဲ့ ၏။ ၁၉၂ဝ ပြည့်နှစ် ကျောင်းသားသပိတ်ကြီးတွင် သပိတ်မှောက်ရာ၌ ပါဝင်ခဲ့ရာမှ ကျောင်းထွက်ခဲ့ရလေသည်။ ထို့နောက် အမျိုးသားကျောင်းများ၌ ကျောင်းဆရာ အဖြစ်လည်းကောင်း၊ ၁၉၂၄-၂၅ ခုနှစ်တွင် မြန်မာပိုင် နယူးဘားမား (The New Burma) အင်္ဂလိပ်သတင်းစာတွင် လက်ထောက်အယ်ဒီတာ အဖြစ်လည်းကောင်း၊ ၁၉၃ဝ ပြည့်နှစ်တွင် ရန်ကုန်တက္ကသိုလ် မြန်မာစာဌာနတွင် ဘာသာပြန် နည်းပြဆရာအဖြစ် တစ်နှစ်ခန့်လည်းကောင်း လုပ်ကိုင်ခဲ့ဖူးသေး၏။

 

တို့ဗမာ အစည်းအရုံးကို စတင် တည်ထောင်သူတို့အနက် သခင်ဘသောင်းသည် တစ်ဦးအပါအဝင် ဖြစ်လေသည်။ လွတ်လပ်မှုကို ကြိုက်နှစ်သက်သူ ဖြစ်သည့်အတိုင်း အလွတ်သတင်းစာဆရာ အဖြစ်ဖြင့် အပြင်မှနေ၍ ဆောင်းပါး ရေး ခြင်း၊ ဘာသာပြန်ခြင်းကိုသာ ပြုသည်။

၁၉၆၂ ခုနှစ်တွင် ပြန်ကြားရေးဌာန၌ စိစစ်ရေးမှူးအဖြစ် အမှုထမ်းခဲ့ရာမှ ၁၉၆၅ ခုနှစ်တွင် မြန်မာ့ဆိုရှယ်လစ် လမ်းစဉ် ပါတီ ပါတီဌာနချုပ်သို့ ပြောင်းရွှေ့ကာ ယနေ့တိုင် တာဝန်​ထမ်းဆောင်လျက် ရှိသည်။

ရေးသားခဲ့သော စာအုပ်များအနက် အချို့မှာ ပန်းသာမစာဥ၊ ခြေလေးချောင်း တော်လှန်ရေး၊ ကမ္ဘာပတ်လည် ရက် ရှစ်ဆယ်၊ နေပြိုင်သူရဲ၊ ဂြိုဟ်စီးဂြိုဟ်နင်း၊ လကမ္ဘာဆီသို့၊ ဗမာ့ဒုံးယာဉ် စသည်တို့ ဖြစ်သည်။

ကမ္ဘာပတ်လည် ရက်ရှစ်ဆယ်စာအုပ်ဖြင့် ၁၉၅၉-၆ဝ ခုနှစ် ယူနက်စကိုဘာသာပြန်ဆုကိုလည်း ရရှိခဲ့သည်။


-ဒဂုန်ရွှေမျှား ရေးသားပြုစုသော မြန်မာနိုင်ငံစာပေဆုများ စာအုပ်မှ ထုတ်နှုတ်ချက် ဖြစ်ပါသည်။